ಬೆಂಗಳೂರು : ಕರ್ನಾಟಕ, ತಮಿಳುನಾಡು, ಆಂಧ್ರಪ್ರದೇಶ, ತೆಲಂಗಾಣ ಮತ್ತು ಕೇರಳ ಸೇರಿದಂತೆ ದಕ್ಷಿಣ ಭಾರತದ ರಾಜ್ಯಗಳು ಕಲ್ಲಿದ್ದಲು ಕೊರತೆ ಎದುರಿಸುತ್ತಿವೆ. ಈ ಪರಿಸ್ಥಿತಿ ಹೀಗೆಯೇ ಮುಂದುವರೆದರೆ ಮುಂದಿನ ದಿನಗಳಲ್ಲಿ ವಿದ್ಯುತ್ ನಿಲುಗಡೆ ಸಮಸ್ಯೆಗಳನ್ನು ಎದುರಿಸಬಹುದು. ಈ ರಾಜ್ಯಗಳು 4 ರಿಂದ 7 ದಿನಗಳ ಕಲ್ಲಿದ್ದಲಿನ ಸರಾಸರಿ ಶೇಖರಣೆ ಹೊಂದಿವೆ, ಆದಾಗ್ಯೂ, ಭವಿಷ್ಯದಲ್ಲಿ ಪೂರೈಕೆ ವ್ಯತ್ಯಯವಾದರೆ ಈ ಪ್ರದೇಶಗಳಲ್ಲಿ ವಿದ್ಯುತ್ ಬಿಕ್ಕಟ್ಟಿಗೆ ಕಾರಣವಾಗಬಹುದು.
ಮೊದಲು ಕರ್ನಾಟಕದ ಬಗ್ಗೆ ನೋಡೋದಾದರೆ, ಈ ಬಿಕ್ಕಟ್ಟನ್ನು ಊಹಿಸಿ, ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿಯವರು ಕೇಂದ್ರ ಸರ್ಕಾರದಿಂದ ದಿನಕ್ಕೆ 14 ರೇಕ್ ಕಲ್ಲಿದ್ದಲನ್ನು ರಾಜ್ಯಕ್ಕೆ ಮಂಜೂರು ಮಾಡುವಂತೆ ಒತ್ತಾಯಿಸಿದ್ದಾರೆ. 1 ರೇಕ್ ನಲ್ಲಿ 4,000 ಟನ್ ಕಲ್ಲಿದ್ದಲು ಬರುತ್ತದೆ. ರಾಜ್ಯದಲ್ಲಿ ಮೂರು ಶಾಖೋತ್ಪನ್ನ ವಿದ್ಯುತ್ ಕೇಂದ್ರಗಳಿವೆ, ರಾಯಚೂರು, ಬಳ್ಳಾರಿ ಮತ್ತು ಎರಂರಾಸ್‌ ವಿದ್ಯುತ್ ಕೇಂದ್ರ. ಈ ಮೂರು ಕೇಂದ್ರಗಳು ದಿನಕ್ಕೆ ಸುಮಾರು 5020 MW ವಿದ್ಯುತ್ ಉತ್ಪಾದಿಸುತ್ತವೆ, ಮತ್ತು ಇದಕ್ಕಾಗಿ 11 ರೇಕ್ ಕಲ್ಲಿದ್ದಲು ಅಗತ್ಯವಿದೆ, ಕರ್ನಾಟಕಕ್ಕೆ ಪ್ರಸ್ತುತ 6 ರಿಂದ 10 ರೇಕ್ ಕಲ್ಲಿದ್ದಲು ಪೂರೈಕೆಯಾಗುತ್ತದೆ. ಇದರಿಂದಾಗಿ ಎಲ್ಲಾ ಮೂರು ಸ್ಥಾವರಗಳಲ್ಲಿ ಮೀಸಲು ಕಲ್ಲಿದ್ದಲು ಬಳಕೆ ಆರಂಭವಾಗಿದೆ.
ತಮಿಳುನಾಡು : ತಮಿಳುನಾಡು ಸಾಮಾನ್ಯವಾಗಿ 2 ರಿಂದ 3 ವಾರಗಳ ಕಲ್ಲಿದ್ದಲು ಸಂಗ್ರಹವನ್ನು ಹೊಂದಿರುತ್ತದೆ, ಆದರೆ ಕಲ್ಲಿದ್ದಲು ಕೊರತೆಯಿಂದಾಗಿ, 4 ರಿಂದ 5 ದಿನಗಳ ಮೀಸಲು ಮಾತ್ರ ಉಳಿದಿದೆ. ಚೆನ್ನೈ, ಮೆಟ್ಟೂರು ಮತ್ತು ಟುಟಿಕೊರಿನ್ 4320 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದಿಸುತ್ತದೆ. 3 ರಿಂದ 5 ದಿನಗಳ ಮೀಸಲು ದಾಸ್ತಾನು ಇದೆ, ಪ್ರಸ್ತುತ ಪೂರೈಕೆಯ ದೃಷ್ಟಿಯಿಂದ, 10 ದಿನಗಳವರೆಗೆ ವಿದ್ಯುತ್ ಅನ್ನು ಅಡೆತಡೆಯಿಲ್ಲದೆ ಪೂರೈಸಬಹುದು ಆದರೆ ಅದರ ನಂತರ ತೊಂದರೆ ಉಂಟಾಗಬಹುದು ಎಂದು ಅಧಿಕಾರಿಗಳು ಹೇಳುತ್ತಾರೆ.
ಆಂಧ್ರಪ್ರದೇಶ : ಆಂಧ್ರಪ್ರದೇಶದಲ್ಲಿ ಸಮಸ್ಯೆ ಹೆಚ್ಚು ಏಕೆಂದರೆ ಅದು ಬೇಡಿಕೆಯ 70,000 ಟನ್ ಕಲ್ಲಿದ್ದಲಿಗಿಂತ ಕೇವಲ 40,000 ಟನ್ ಪೂರೈಕೆಯನ್ನು ಪಡೆಯುತ್ತಿದೆ. ಕಳೆದ ವಾರ ಕಲ್ಲಿದ್ದಲಿನ ಕೊರತೆಯಿಂದಾಗಿ 3 ವಿದ್ಯುತ್ ಕೇಂದ್ರಗಳನ್ನು ಮುಚ್ಚಬೇಕಾಯಿತು. ಪ್ರಸ್ತುತ ಆಂಧ್ರಪ್ರದೇಶದಲ್ಲಿ ಕೇವಲ 2 ದಿನಗಳ ಸ್ಟಾಕ್ ಉಳಿದಿದೆ. ಸಿಎಂ ಜಗನ್ ಮೋಹನ್ ರೆಡ್ಡಿ ಕೂಡಲೇ ಕಲ್ಲಿದ್ದಲು ಪೂರೈಕೆಗೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿದ್ದಾರೆ.
ಕೇರಳ : ಕಲ್ಲಿದ್ದಲು ಕೊರತೆ ಸಮಸ್ಯೆಯನ್ನು ಕೇರಳ ಸರ್ಕಾರವೂ ಸೂಕ್ಷ್ಮವಾಗಿ ಗಮನಿಸುತ್ತಿದೆ. ಸಾಮಾನ್ಯ ಜನರಿಗೆ ವಿದ್ಯುತ್ ಅನ್ನು ಎಚ್ಚರಿಕೆಯಿಂದ ಮತ್ತು ಅಗತ್ಯಕ್ಕೆ ತಕ್ಕ ಹಾಗೆ ಖರ್ಚು ಮಾಡುವಂತೆ ಮನವಿ ಮಾಡಲಾಗಿದೆ, ಇಲ್ಲದಿದ್ದರೆ ಭವಿಷ್ಯದಲ್ಲಿ ವಿದ್ಯುತ್ ವ್ಯತ್ಯಯ ಉಂಟಾಗಬಹುದು. ಸಂಜೆಯ ಸಮಯದಲ್ಲಿ 120 ರಿಂದ 200 MW ವಿದ್ಯುತ್ ಕೊರತೆಯಿದೆ. ಅಧಿಕಾರಿಗಳ ಪ್ರಕಾರ, ಪ್ರಸ್ತುತ ಇರುವ ಸ್ಟಾಕ್‌ನಿಂದ ಪೂರೈಕೆ ಸಾಧ್ಯ, ಆದರೆ ಈ ಸಮಸ್ಯೆ ದೀರ್ಘಕಾಲದವರೆಗೆ ಇದ್ದರೆ, ಸರ್ಕಾರವು ಕೆಲವು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ.
ತೆಲಂಗಾಣ: ತೆಲಂಗಾಣದಲ್ಲಿ ಪ್ರಸ್ತುತ ಪರಿಸ್ಥಿತಿ ನಿಯಂತ್ರಣದಲ್ಲಿದೆ. ನೆರೆಯ ಆಂಧ್ರಪ್ರದೇಶಕ್ಕೆ ಸಹಾಯ ಮಾಡಲು ಕೇಂದ್ರ ಸರ್ಕಾರದ ಸೂಚನೆಗಳ ಮೇರೆಗೆ ಸಿಂಗರೇಣಿ ಕಲ್ಲಿದ್ದಲು ಗಣಿಯಿಂದ 30 ರ ಬದಲು ಪ್ರತಿದಿನ 34 ರೇಕ್ ಕಲ್ಲಿದ್ದಲು ಉತ್ಪಾದಿಸಿ ಸರಬರಾಜು ಮಾಡಲಾಗುತ್ತಿದೆ.
ಗೃಹ ಸಚಿವ ಅಮಿತ್ ಶಾ ಕಲ್ಲಿದ್ದಲು ಕೊರತೆ ಮತ್ತು ವಿದ್ಯುತ್ ಬಿಕ್ಕಟ್ಟಿನ ಬಗ್ಗೆ ವಿದ್ಯುತ್ ಸಚಿವ, ಕಲ್ಲಿದ್ದಲು ಮಂತ್ರಿ ಮತ್ತು ಇತರ ಅಧಿಕಾರಿಗಳೊಂದಿಗೆ ಒಂದು ಗಂಟೆ ಕಾಲ ಸಭೆ ನಡೆಸಿದರು. ಮೂವರು ಮಂತ್ರಿಗಳು ವಿದ್ಯುತ್ ಸ್ಥಾವರಗಳಿಗೆ ಕಲ್ಲಿದ್ದಲು ಲಭ್ಯತೆ ಮತ್ತು ಪ್ರಸ್ತುತ ವಿದ್ಯುತ್ ಬೇಡಿಕೆಗಳ ಬಗ್ಗೆ ಚರ್ಚಿಸಿದ್ದಾರೆ ಎಂದು ನಂಬಲಾಗಿದೆ. ನಿನ್ನೆ ವಿದ್ಯುತ್ ಸಚಿವ ಆರ್ ಕೆ ಸಿಂಗ್ ಅವರು ಕಲ್ಲಿದ್ದಲು ಕೊರತೆಯ ಸಮಸ್ಯೆಯನ್ನು ದೇಶದಲ್ಲಿ ಅತಿಯಾಗಿ ಪ್ರಚಾರ ಮಾಡಲಾಗುತ್ತಿದೆ ಎಂದು ಹೇಳಿದರು.
