ಬೆಂಗಳೂರು : ಚಿತ್ರರಂಗದ ಜೊತೆ ನಂಟು ಹೊಂದಿರುವ ಡ್ರಗ್ಸ್ ದಂಧೆಯ ಜಾಲ ದೊಡ್ಡದಾಗಿದೆ. ತನಿಖೆ ನಡೆಸಿದಂತೆಲ್ಲ ಹೊಸ ಹೊಸ ಸೆಲೆಬ್ರಿಟಿಗಳ ಹೆಸರುಗಳು ಹೊರಬರುತ್ತಿವೆ. ಇಂದು ಬೆಳ್ಳಂ ಬೆಳಗ್ಗೆಯೇ ಪೊಲೀಸರು ಬೆಂಗಳೂರಿನಲ್ಲಿ ಸೆಲೆಬ್ರಿಟಿಗಳ ಮನೆ ಮೇಲೆ ದಾಳಿ ನಡೆಸಿದ್ದಾರೆ.
ಗೋವಿಂದಪುರ ಡ್ರಗ್ಸ್ ಕೇಸ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈ ದಾಳಿ ಮಾಡಲಾಗಿದೆ. ಸೋನಿಯಾ, ಡಿಜೆ ವಚನ್ ಚಿನ್ನಪ್ಪ, ಉದ್ಯಮಿ ಭರತ್ ಮುಂತಾದವರ ಮನೆಯ ಮೇಲೆ ಬೆಂಗಳೂರು ಪೂರ್ವ ವಿಭಾಗದ ಪೊಲೀಸರು ದಾಳಿ ಮಾಡಿದ್ದಾರೆ. ನೈಜೀರಿಯನ್ ಡ್ರಗ್ ಪೆಡ್ಲರ್ ಥಾಮಸ್ ಕಲು ಬಾಯಿಬಿಟ್ಟ ಮಾಹಿತಿ ಮೇರೆಗೆ ಹಾಗೂ ವಿವಿಧ ಸಾಕ್ಷ್ಯಾಧಾರದ ಮೇಲೆ ಪೊಲೀಸರು ಈ ದಾಳಿ ಮಾಡಿದ್ದರು.
ಸದ್ಯ ಮತ್ತಷ್ಟು ಸೆಲಬ್ರಿಟಿಗಳ ಹೆಸರು ಡ್ರಗ್ಸ್ ಪ್ರಕರಣದಲ್ಲಿ ಹೊರ ಬಂದಿದ್ದು, ಗೋವಿಂದಪುರ ಡ್ರಗ್ಸ್ ಪ್ರಕರಣಕ್ಕೆ ಹೊಸ ಟ್ವಿಸ್ಟ್ ಸಿಕ್ಕಿದೆ. ಡ್ರಗ್ ಪೆಡ್ಲರ್ ಥಾಮಸ್ ಕುಲು ಜೊತೆ ಸಂಪರ್ಕ ಇದ್ದ ವಿವಿಧ ಸೆಲಬ್ರಿಟಿಗಳು, ಉದ್ಯಮಿಗಳ ಮನೆಗಳ ಮೇಲೆ ಪೊಲೀಸರು ರೇಡ್ ಮಾಡಿದ್ದಾರೆ. ರಾಜಾಜಿನಗರ, ಪದ್ಮನಾಭನಗರ ಮತ್ತು ಬೆನ್ಸನ್ ಟೌನ್ನಲ್ಲಿರುವ ಡಿಜೆ ವಚನ್ ಚಿನ್ನಪ್ಪ, ಉದ್ಯಮಿ ಭರತ್, ಸೆಲಬ್ರಿಟಿ ಸೋನಿಯಾ ಅಗರವಾಲ್ ಅವರ ಮನೆಗಳ ಮೇಲೆ ಪೊಲೀಸರು ದಾಳಿ ಮಾಡಿದ್ದಾರೆ.
ಗೋವಿಂದಪುರ ಪೊಲೀಸ್ ಠಾಣೆಯಲ್ಲಿ ಕೈದಿಯಾಗಿರುವ ಥಾಮಸ್ ಕಲು ನೀಡಿದ ಮಾಹಿತಿ ಆಧಾರದ ಮೇಲೆ ಪೊಲೀಸರು ಈ ರೇಡ್ಗಳನ್ನ ಮಾಡಿರುವುದು ತಿಳಿದುಬಂದಿದೆ. ಬನಶಂಕರಿಯಲ್ಲಿ ರಿಯಲ್ ಎಸ್ಟೇಟ್ ಉದ್ಯಮಿಯಾಗಿರುವ ಭರತ್ ಅವರನ್ನ ಪೊಲೀಸರು ವಶಕ್ಕೆ ಪಡೆದು ವಿಚಾರಣೆಗೆ ಠಾಣೆಗೆ ಕರೆದೊಯ್ದಿದ್ದಾರೆ. ಆರ್ಗ್ಯಾನಿಕ್ ಉತ್ಪನ್ನಗಳ ಉದ್ಯಮ ಹಾಗೂ ಕಾಸ್ಮೆಟಿಕ್ ವಸ್ತುಗಳ ಉದ್ಯಮದಲ್ಲಿ ತೊಡಗಿಸಿಕೊಂಡಿರುವ ಸೋನಿಯಾ ಅಗರವಾಲ್ ಅವರ ಮನೆಯಲ್ಲಿ 40 ಗ್ರಾಂ ಗಾಂಜಾ ಸಿಕ್ಕಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಹೆಚ್.ಆರ್.ಬಿ.ಆರ್ ಲೇಔಟ್ನಲ್ಲಿ ಬಾಡಿಗೆ ಮನೆಯಲ್ಲಿದ್ದ ನೈಜೀರಿಯಾ ಮೂಲದ ಡ್ರಗ್ ಪೆಡ್ಲರ್ ಥಾಮಸ್ ಕಲು ಅವರನ್ನ ಇದೇ ಆಗಸ್ಟ್ 12ರಂದು ಗೋವಿಂದಪುರ ಠಾಣೆ ಪೊಲೀಸರು ಬಂಧಿಸಿದ್ದರು. ಈ ವೇಳೆ, 1.50 ಲಕ್ಷ ರೂ ಮೌಲ್ಯದ 403 ಎಕ್ಸ್ಟೆಸಿ ಪಿಲ್ಸ್ಗಳನ್ನ ಪೊಲೀಸರು ವಶಪಡಿಸಿಕೊಂಡಿದ್ದರು. ಈತ ಈ ಎಕ್ಸ್ಟೆಸಿ ಮಾತ್ರೆಗಳನ್ನ ಕಾಲೇಜು ವಿದ್ಯಾರ್ಥಿಗಳು ಹಾಗೂ ಟೆಕ್ಕಿಗಳಿಗೆ ಕೊಡುತ್ತಿದ್ದ. 350 ರೂಪಾಯಿಗೆ ಎಕ್ಸ್ಟೆಸಿಯನ್ನ ಖರೀದಿಸಿ 3 ಸಾವಿರ ರೂಪಾಯಿಗೆ ಅದನ್ನ ಮಾರುತ್ತಿದ್ದ. ಸೆಲಬ್ರಿಟಿಗಳಿಗೆ ಅತಿ ದುಬಾರಿಯ ಕೊಕೇನ್ ಸಿಂಥೆಟಿಕ್ ಡ್ರಗ್ಸ್ ಕೊಡುತ್ತಿದ್ದ. ಒಂದು ಗ್ರಾಂ ಕೊಕೇನ್ ಅನ್ನು 15 ಸಾವಿರ ರೂಗೆ ಮಾರಾಟ ಮಾಡುತ್ತಿದ್ದನೆನ್ನಲಾಗಿದೆ.
ಥಾಮಸ್ ಕಲು ಯಾರು?
ಕಲು ಡ್ರಗ್ಸ್ ಸೇವನೆ ಮಾಡಿ, ಹೆಲ್ಮೆಟ್ ಇಲ್ಲದೇ ವಾಹನ ಚಲಾಯಿಸುತ್ತಾ ಕೆಆರ್ ಪುರಂ ಪೊಲೀಸರ ಮುಂದೆ ಗಲಾಟೆ ಮಾಡಿದ್ದ. ಡ್ರಗ್ ಕನ್ಸೂಮ್, ಟ್ರಾಫಿಕ್ ರೂಲ್ಸ್ ಉಲ್ಲಂಘನೆ ಹಾಗೂ ಎನ್ಡಿಎಂಎ ಕಾಯ್ದೆ ಅಡಿ ಪೊಲೀಸರು ಈತನನ್ನು ಬಂಧಿಸಿದ್ದರು.
ಇತ್ತೀಚೆಗೆ ಥಾಮಸ್ ಕಲು ಜೊತೆ ಹಲವು ಸೆಲಬ್ರಿಟಿಗಳ ಡ್ರಗ್ಸ್ ನಂಟು ಇರುವ ವಿಚಾರ ಪೊಲೀಸರಿಗೆ ಗೊತ್ತಾಗಿತ್ತು. ಹೀಗಾಗಿ, ಈತನ ಮನೆ ಮೇಲೆ ರೇಡ್ ಮಾಡಿದಾಗ ಮಾದಕವಸ್ತುಗಳು ಸಿಕ್ಕಿದ್ದವು. ಈತನ ಮೊಬೈಲ್ ಪರಿಶೀಲಿಸಿದಾಗ ಸೆಲಬ್ರಿಟಿಗಳ ಸಂಪರ್ಕ ಇರುವುದು ದೃಢಪಟ್ಟಿತ್ತು. ಆ ಆಧಾರದ ಮೇಲೆ ವಚನ್ ಚಿನ್ನಪ್ಪ, ಭರತ್ ಮತ್ತು ಸೋನಿಯಾ ಅಗರ್ವಾಲ್ ಅವರ ಮನೆಗಳ ಮೇಲೆ ಪೊಲೀಸರು ದಾಳಿ ಮಾಡಿದ್ದಾರೆ.
ಸೋನಿಯಾ ಅಗರ್ವಾಲ್ ಮನೆಯಲ್ಲಿ ಇರಲಿಲ್ಲವಾದ್ದರಿಂದ ಅವರ ತಂದೆಯ ಉಪಸ್ಥಿತಿಯಲ್ಲಿ ಮನೆಯ ಬಾಗಿಲು ತೆರೆದು ಶೋಧಿಸಲಾಯಿತು. ಈ ವೇಳೆ 40 ಗ್ರಾಂ ಗಾಂಜಾ ಸಿಕ್ಕಿದೆ. ಬಳಿಕ ಖಾಸಗಿ ಹೋಟೆಲ್ ನಲ್ಲಿ ಸೋನಿಯಾ ಅವರನ್ನ ವಶಕ್ಕೆ ಪಡೆಯಲಾಗಿದೆ.
ಬನಶಂಕರಿಯಲ್ಲಿ ರಿಯಲ್ ಎಸ್ಟೇಟ್ ಉದ್ಯಮಿಯಾಗಿರುವ ಭರತ್ ಜೊತೆ ಥಾಮಸ್ ಕಲು ನೇರ ಸಂಪರ್ಕ ಇತ್ತು. ಭರತ್ ತನ್ನದೇ ಫ್ಲಾಟ್ನಲ್ಲಿ ಡ್ರಗ್ಸ್ ಪಾರ್ಟಿ ನಡೆಸುತ್ತಿದ್ದ ವಿಚಾರ ಸೇರಿದಂತೆ ಹಲವು ಮಾಹಿತಿಯನ್ನು ಕಳೆದ 15 ದಿನಗಳಿಂದ ಪೊಲೀಸರು ಕಲೆಹಾಕಿದ್ದರು. ಇಂದು ಭರತ್ ಮನೆಗೆ ದಾಳಿ ಮಾಡಿ ಶೋಧ ನಡೆಸಿದರು. ಬಳಿಕ ಅವರನ್ನ ವಶಕ್ಕೆ ಪಡೆದು ವಿಚಾರಣೆಗೆ ಕರೆದೊಯ್ದಿದ್ದಾರೆ.
